श्रष्टा सम्मान तथा पुरस्कार वितरण २०८१

भाषा, साहित्य, वाङ्मयको आधार, सांस्कृतिक संरक्षण विकासको पूर्वाधार भन्ने मूल नारा सहित २०७३ सालमा स्थापित गीतल प्रतिष्ठान नेपाल तथा नाटक मञ्च, दमौली, तनहुँले यस वर्ष नेपाल प्रज्ञा प्रतिष्ठानको सिद्धिचरण हल, कमलादीमा आज मिति २०८१ चैत्र ३० गते शनिवार आयोजना गरेको कार्यक्रममा सरदार यदुनाथ खनाल सम्मान-२०८१ बाट डा भेष बहादुर थापा, क्षेत्र प्रताप स्मृति साहित्य पुरस्कार -२०८१ बाट प्राज्ञ सरुभक्त, नेपाल अधिराज्यमा तनहुँ कृति वाङ्मय पुरस्कार-२०८१ बाट डा सत्यप्रकाश तिवारी (भारत), गीतल राष्ट्रिय पुरस्कार -२०८१ बाट श्री ओम रिजाल (दैलेख) र गीतल प्रतिभा पुरस्कार -२०८१ बाट श्री नारायण कैलाश सिग्देल (तनहुँ) सम्मानित हुनु भएको छ ।

कवि तथा गीतकार स्व. क्षेत्र प्रताप अधिकारी नेपाली साहित्य तथा संगीतजगतले सधैँ सम्झिने नाम हो । वि सं १९९९ चैत्र महिनामा ज्यामरुक बयापानी तनहुँमा जन्मिएका अधिकारीले आफ्नो जीवनकालको अन्तिम क्षण पनि कला र साहित्य क्षेत्रलाई नै समर्पित गर्दै वि सं २०७० साल चैत्र ३० गते आइतबार बेलुका स्वर्गारोहण भएका थिए ।
गामबेसीका कविका रुपमा स्थापित कवि क्षेत्र प्रताप अधिकारीको स्मृति दिवसमा गीतल प्रतिष्ठान तथा नाटक मञ्च नेपाल तनहुँको आयोजनामा नेपाल प्रज्ञा प्रतिष्ठान कमलादीको सिद्धिचरण सभाकक्षमा आयोजित कार्यक्रममा स्व क्षेत्र प्रताप अधिकारीको नाममा निरन्तर वितरण गरिदैं आएको सम्मान “क्षेत्र प्रताप स्मृति साहित्य पुरस्कार २०८१” बाट यस वर्ष आदरणीय साहित्यकार प्राज्ञ सरुभक्त सम्मानित हुनु भएको छ ।
विशेष कारणले उहाँले पोखराबाट काठमाडाैंको यात्रा तय गर्न नसक्नुभएको भएपनि गीतल प्रतिष्ठान तथा नाटक मञ्चले गर्ने कुनै अर्को कार्यक्रममा उहाँले अवश्य सम्मान ग्रहण गर्ने वचनबद्धता आएको अध्यक्ष आकाश अधिकारीज्यूले बताउनुभयो । आदरणीय गायक लाक्पा शेर्पाज्यूले स्व. क्षेत्र प्रताप अधिकारीको सम्झनामा उहाँकै एक लाईन “म त लालीगुराँस भएछु” भन्ने गीत गाएर श्रद्धासुमन अर्पण गर्नुभयो ।

उक्त कार्यक्रमा थुप्रै साहित्यप्रेमी महानुभावहरुको सुखद उपस्थिति रह्यो ।